8 лет моего ребенка, что прошли без матери
Баъзан “болаларимга яхши она бўлмаганман” деб ўйлайман, бундай пайтларда онанинг - ўзи билан меҳмондорчиликка олиб борган боласини шўхлик қилгани учун сонидан аста чимчилаб олгани каби руҳимни “чақиб” олавераман мен.. Болалигида қийинчилик кўрмай, ҳурликда улғайган аёлнинг ўз фарзандларини қийинчиликда боққани алам қилаверарди... Баъзан кечаси билан мижжа қоқмай, тонг отмай туришини Яратгандан сўрардим, чунки мактабга борадиган болаларим учун нонушта тайёрлашга лойиқ егулик бўлмасди уйда.. Аммо шунда ҳам бир нималар ўйлаб топар ва йўқликдан дастурхонга нонушта ҳозирлардим – албатта бундан фарзандларим хабарсиз эди, худди улар тугул ҳеч кимга, ҳатто ака-опаларимга ҳам дардимни очмаганим каби.. Шу-шу юрагим ёпиқлигича қолди – яқинларим билан дардимни бўлашишга ҳеч ўрганолмадим... Тирноқларим билан ер қаздим, тишларим билан тугунларни сўкдим – аммо 2 ва 5 ёшидан эътиборан болаларимни ёппа-ёлғиз вояга етказдим.
У - 20 йил. Мени бу дунёда яшатган фақат болаларим бўлди – улар дунёимни, дунёим эса уларни тутди бу оламда. Аллох суйибдики мени, қалблари тенгсиз гўзал фарзандлар берибди менга дейман ҳар замон. Қаердаки мард, танти, хулқи ва амали хуш инсонларни кўрсам, уларга ҳавас қилдим, “фарзандларим ўхшасин” дедим.. Аммо яна-да болаларимга яхши она бўлолмадим – 8 йил аввал хорижга жўнаб кетган болаларим оналарини соғинганда, бағримни соғинганларида бағрим узоқлик қилди уларга – олислардан туриб фақатгина осмонларни қучдим, ҳаволарни сийпалади қўлларим... 21 ёшдаги ўғлим, 18 ёшдаги қизимни онасисиз йўлладим ҳаётга. Не қадар шафқатсиз она эдим мен!
Бугун ўғлим ўзи тайёрлаган кичик хужжатли фильмини менга юборибди. Бу шохона бир фильм эди! Ҳаётимда кўрганим энг гўзал лавҳа. Одатда 2 соат давом этадиган сюжетни айтишади хужжатли фильм деб, лекин у 1,5 дақиқалик ҳам бўлиши мумкин экан, қачонки Онасини йиғлатадиган даражада маҳорат қўлланилганда... Уни кўришни бошлаганимдаёқ, мен болаларимга яхши она бўлолмаганим ҳақидаги фикр яна келди қаршимга ва бу туйғу ҳалиям мени тарк этгани йўқ...
Оҳ, чала-ярим онасини йиғлатган болам!!
Сабоҳат Раҳмон
